| Florida Zomi Innkuan Florida, U.S.A Since 2000 |
zomiflorida@yahoogroups.com zomifla@yahoogroups.com |
 |  |  |  |  |
Easter 2009 FZI Khawmpi FZI khawmpi Easter Sunday April 12, 2009 ni in nopci tak in a nuai aa bang in ki bawl hi: Amun: Hollywood, Florida (Pa Suan Mang & Nu Lunboih te Inn) A hun:11:00AM - 5:00PM Zo Ngeina thu manpha te sinna ki nei aa, tua lai ah Rev. Vungh En Thang in hong makai hi. Zin Mangpi Sia Suan Za Pau (Senior Pastor, Word of Hope Church, Yangon, Myanmar) leh Siama Sangpui te nupa in Kha an limtak leh la ngaih no no te tawh hun hong zang thei uh hi. Thu leh Maan te a kicing in a nuai ah ki en thei hi. |
2009 Easter FZI Khawmpi ah Zo Ngeina sinna ki nei hi.
Rev. Vungh En Thang in hong makai in a nuai aa Zo Ngeina thu manpha te ki kum thei hi.
Hih Zo Ngeina sinna pen a hun zui in FZI in ki nei to den ding hi.
Hih anuai aa thu te in Sia Thang Sian (Tennessee, U.S.A) lai ngelh na tung tawn pan a ki la a hihi.
ZOMI, ZOGAM, ZOPAU
BIAKNA LEH NGEINA (i)
ZOMITE SANGGAM KIM LEH PAM KIZOPNA
Mihingte mimal khatleh-khat kizopna kammal
A kihonkholh ganhingte lakah, ahon lianpen mihing ahi hi.Ganhingte zong amau ngeina ciat utawh kizopna kammal nei uh hi.Kizopna ol theihna dingin mikhempeuh min
khatciat kivawh hi.Pahtawina, zahtak piakna leh itna lahna tawh kihopihna min zong a tuamin kiguan hi.Tua pen minno kici hi.Mimal in a tuamneih min leh kinaina zui-a
kihopihna min om hi.Tua min leh kammal zangin khatpeuh hong paukhia leh amah kihopih ahihlam kitelpah ahihmanin thudonlo-in om thei lo hi.
Mihingte pen pilna leh thukhualna tawh kidim Pasian lim suun te ihi hi.Minmal aa kihopih sangin tuamin sangin khumzaw khat kizang leh lungkimna, ki-itna leh kinaina
khangsak zaw se mawk hi.Tua ahih ciangin mintak tawh kiho lala lo zaw a, pianna sisan kinaina zui-in minno kiguan hi.Tuaminte in ei bangzahin kinai cih hong lak pah hi.
Min pen mipum taang-a ding hi a khuttawh kilawn kulse lo-in tua min kilawh simin a neipa nalawngkha pah lel hi.Kinaina zui a kivawh min a zangsiamte pen mipil, thukhual
kici hi.Ki-itna khangsak bek thamlo-in kilamnaihna-hoih piangsak hi.A zangsiam khempeuh tungah itna leh pahtawina kipia hi.
Puu, Pii
Puu pen lakam tawh puvon, theisen puvon ci uh hi. Pii pen pisei kici hi.Ei pianna Pa leh ama khangual khempeuh Puu kici hi.Tua mah bangin ih Pa leh ih Nu pianna Nu
khempeuh leh ama khangual khempeuh Pii kici hi.
Pa, Nu
Ih pianna Pa leh ama sanggam pasal khempeuh leh khang kibang pasal khempeuh Pa kici hi.Ih pianna Nu leh ama sanggam numei khempeuh, Pa icih te ziite khempeuh
Nu kici hi.Lakamin i pau ciangin zua, zuapa, khang zuapa, zuamang cih bangin kizangh hi.Nu pen tun, tunnu, nutun cih bangin kizang hi.
Munkhatkhat te ah zatdan neukhakha kilamdang hi.Saizang tate in, Nupi, Papi acih uleh innkuanpih neisa numei pasal gennuam hithei uh hi.Pa uunau sungah a haampen
zong Papi mah civeve hi.Papi zii zong Nupi mah kici a, Nu unau sungah upapen zong Nupi mah ci uh hi.
Gang, Ni
Gang pen lakam tawh Gangzuapa kici hi.Ni pen, Senninu, Ninu, ci uh hi. Behsung a ih Pa gual sanggam khempeuh Ni kicikhin siksek hi. Ni a kici khempeuh pasalte pen
Gang kici khin siksek hi.
Uu, Nau
Uu pasal ahihleh Ciinmang kici a, uu numei ahihleh Ciin-lianu kici hi.Ei sangaa khangham zaw khempeuh numei pasal deilo-in uu kici hi.Eisang aa kumtawmzaw
sanggamte bek Nau kici thei hi.Ei laizom ahilote Nau-kanau kici lo hi.
Tu, Ta
Ih sung aa piang tate suan leh khak khempeuh “Tu” kici hi. Ei bangkua pan aa paikhia numei, mokhakte suan leh khak khempeuh zong “Tu” mah ahi hi.Tu pen lakam tawh
“sawn” kici hi.Ih sungaa piang khempeuh ih ta ahi hi.Lakam tawh “Von, vondeih” cih bangin kilo se hi.
Nuphal
Ih zii sanggam khempeuh leh amau pasal khempeuh “Nuphal” kici hi.Sanggam bul leh teek gualna-ah zong Nuphal panmun khat kiguang hi.Nopna dahna munah Nuphal
pen panmun thupi neihloh phamawh ahi hi.
Maak', Sungh
Mokhak numeite pasal khempeuh pen “Mak” kici hi.Mak-tangzang' ci-in zatzang sawltak in kinei hi.Ih zii pianna leh hong paikhiatna bangkua pen“Sungh” kici hi.Sanggam
ihgualh ciangin Sunghpi panmun thupi ahi hi.A zi ii Pa pen “Sunghpa” kici a, a zi ii Nu pen “Sunghnu” kici hi.Sunghpi cih ciangin Numeilam ah sanggam bul pen ahi hi.
Hih minte pen bangzahin khang kilamdang taseleh kilaih theilo hi.Zomi hi-a Zokam i pau laiteng kikhel theilo a, kipuahpha theilo hi.Hoih takin nazat siam ciang mihoih
mipha-in hong kimu ding hi.Midikte zat ngeina hoih ahi hi.Zomi suan khempeuh in theh huai hi.
----------------------------------------
BIAKNA LEH NGEINA (ii)
ZOMITE KI-UAPNA THUKHUN
Ki-uapdan Panmun Sehna Thukhun
Sanggam-Bul leh Teek, Sanggam phamawh, Tanu-tapa ci-in atuamtuamin kizang hi.Ei mun ciatah zatdan lawhdan kilamdang kha ding hi.Nalungsim mitkha tawh
thubulphuh enkawmsa-in natelsiam in.
Ei Zomite pen nopna-dahna-ah ki-uap diak minamte ihi hi. Ki-uapna thukhun kiptakin kinei hi.Ahau azawng omlo-in tua thukhun in huamkha kim hi. Panmun kisehna om
dimdiam ahihmanin, a haute khengval theilo, a zawngte tasam theilo hi. Ih Pu ih Pate pen thukpil mahmah mawk uh hi. Panmun kisehna banah a hau te pen a pualam
panin a uap tamzaw deuh a, a zawngte tawmzaw deuh bek hi.Hau leh zawng leh panmun kisehna zuih kul aa kuamah giautaulo, tasam theilo hi.
Hih Ngeina leh Thukhunte pen Lawki Pupate khun ahihmanin Zu leh Sakuang tawh kizui den hi.Abul leh a dawn zui-in zu kihawm sa kihawm a, abullam kihamphat zaw hi.
Gamtatna ah zong abulte liantat-in adawnte neutat zawpah hi.
Sanggam zondan
Sanggam a kizon ciangin Numeilam leh Pasallam kikhaikim dingin kigual hi. Tua panmunte pen nopna leh dahna munah awngkhong sak lo hi.A hihtheih keileh amau
taangin khat teitei cial uh hi. Ei taanga dingte pen Puakdawn kici hi. Puakdawnte pen eitanh-taang zu leh sa kipia hi.
Pasallam pan
Thalloh or Bangkuapi
Phungsung leh bangkua sung panmun lakah vanlian pen kisuan ahi hi.Nopna-dahna, kolbulh khauhen tuak a zumkong mangkong phutna leh tuahsiatna khempeuh
thuvaanpi ahi hi.Sanggamte taangin kikham tawntung hi.Tua ahih ciangin Innluahpipa kiseh hi. Unau sungpan luangphaam ding aa muanpi pen ahi hi.
Ih Pu ih Pate in Tualgal do uh hi.Khat leh khat Phuu kila uh hi. A sanggamte Phuu a langam dingin Uupipa sang a muanhuai zaw omlo hi. Kolbulh khauhen tuak a omleh
suut hi.Leiba alohzawh keileh lohsak hi.Zi leh ta leisak pisak hi.Innsia losia vaanin puahsak hi. Thusia thupha hawmding geelding khempeuh pen Thalloh or Bangkuapi lo-
in kikhensat lo hi.
Zinkhak, Sanggam nihna Zinkhak pen Bangkuapi kici Thallohpa zom ahi hi. Sanggam naipen te lakah a muanhuai khat kiman hi.Thallohpi vangik lua ahih ciangin a
puakpih dingin Zinkhak kici Sanggam-nihna kikoih hi. Hilh ding, gen ding leh thuzaksak ding om khempeuh aman vaan hi. Khual leh tual pan zin leh leeng hong paite zintun
sehsak hi.
Tanupi, Haitawi, Tuitak
Innsung Tanupi or Tuitak or Haitawi pen tanu mokhakte lakpan a haampen mah kiseh hi.Tua ahih ciangin Tanupi ci uh hi. Bangkuapi kici innsungpi ahihkeh Pusa thoih
ciangin, Siampipa tuiphih ding zu taak sak ahih ciangin Tuitaak kici hi.Tulpipa hail /keu tawi sak ahihmanin Haitawi zong kici hi.Amah pen nopna-dahna nasep khempeuh
vaihawmpi hi-a, Managing Officer tawh kibang hi.
Tanu-nihna, Sawlla, Tanu-nauzaw
Tanupi tawh kibangin seemkhawm uh hi.Mokhakte sungpan ahaamlam mah kizong hi.Innsungpi thoih ciangin sagolhna ding sialsawlmam leh Nuhdo-song tungaa suan
ding sawlsan hiangbawk la ahihmanin Sawlla kici hi.
Hih Tanupi nihte in innsung nasep khempeuh buplak ahih ciangin panmun lian mahmah hi.Sihna-ah anat hun aa kipan azun a-ek siaksak hi.Siluang apaihkhiat mateng
tenpih hi. Tanukhak kici tanu-nautaangte nasep hawmsak a, khut kilenin seemkhawm uh hi.Tanu-nihna pen Work-supervisor tawh kibang hi.
Beh-sabawl, Sanggambul thumna
Beh sunga sanggam muantaak cing te kiseh hi.Nopna-dahna-ah ganpum a kisapleh aman vaan pah hi. Thallohpa sawl bangin sa semm in hawm hi. Thukhun zui-in sa
asemtheih keileh a siamte cial hi.Zomite ngeina sungah panmun zui-a sa kihawmte pen a theepdeuh a vodeuh ki-encik mahmah hi.A sasan ahoih keileh kinolh thei hi.
Satanh anolhleh a ma panmun zong anolh cihna hi.Deihsak leh deihsakloh pen sasem hoih leh hoihlo tungpan sittel uh hi. Tua ahih ciangin sasemmte siam mahmah leh
kidop mahmah kul hi.
Beh-thusa
Innlak sanggam ngaih khat kiseh hi.Innsung lai-atpi khat ahi hi.Sanggam bulleh-teek kisehnate ciamteh hi.Nopna-dahna-ah ki-uapna sum /khuttawi khempeuh ciamteh hi.
Leengna phazah leh sum ngahzah, an kingahzah, zubeel phazah, cikhum bawngnawi kipia khempeuh ciamteh hi.Zubeel sangin agualh khit ciangin zuleih hi.Niangtui zatna
munah niangtui awm hi. Innlam ciangin innkim aa ninpa nahtak kinusiate phiatin puahsiang hi.
Numeilam pan
Sunghpi
Numeilam panin a bul khatna a hi hi.Ih zi hong paikhiatna bangkua bulpen kizong hi. Numeilam panin thukuppih a lian pen ahi hi. Ih zi sanggam upa pen kiman hi.
Sungh-sabawl
Beh-sabawl tawh a kibangin seem khawm uh hi.
Nuphal
Ih zi sanggam sungpan ngaihdiak kithutuahpih zawdeuh khat kiman hi.Amau dinmun pen Zawl panmun mahtawh kibang hi.Ton-zupinun ciangin Zawl leh Nuphal in antawi
piakhawm uh hi.Sih ciangin amaute nih in mipiheu sungin innteek tutpih uh hi. Sigui khit ciangin sigal mipi te pen innciah tawh hanpai tawh kikhenthaang ahihman,
innteekah kuamah omlo hi.Sinung ci-in paunakin kinei hi.Tua hun sungteng Zawl leh Nuphal in innteekte zupeeng kiciampih a, hehnepna dahla sutpih uh hi.Sinungah
latung leh lagualnuam sak luanluan khawng kideihlo hi.
Zawl
Zawl pen neulawm ahi khangual ki-itpih kiman hi.Ton zupinun ciangin sialgawhna ding sialkhau kiheek sak hi.Songsuite tawh songnuai-ah ailawngto in zanhak uh hi.
Zawlngawng kici-in sialngawngsa kipia hi.
Hih Sanggam bul leh teek panmun pen a khangkhangin kikhel toto hi. Hih Thukhunte pen Pupa Ngeina Lawkite hunin muibun mahmah hi. Khang masa Zomite ki-uapna
thukhun pen kician sinsen a, Tapidaw kici Christian hun nangawnin kipaaisiang theilo hi.
KI-UAPNA THUKHUN PUAHPHAT HUAI
Ki-uapna thukhun pen Zomi Lawki huntawh kituakin kilawm ngiaingiai mahmah hi. Ahi zongin tua pen leitung dangtawh kizoploh hunlai ahi hi. Bangzahin hoih taseleh ahun
paizia tawh a kituak keileh, laih ding, puah ding hito zel hi. Ngeina hi ci-in puah ngeikei mawk leng, savun umlui sung aa leenggahtuithak thun mah bang ding hi. Khuazing
leh khuavak koihkhop bang ding hi.
Christian biakna leh Pupate ki-uapna thukhun pen kituak taktak lo, lah kipaikhiasiang theilo khatin om nimnum hi.Puahthakna thukhun kician omlo ahihmanin, minam
dangte ngeina in hong huzaap zaw a kipaipai lel hi. Ngeina a manthan ciangin minam zong a lang /amangthaang khin ahi hi.Kampau aman ciangin minambup maang ahi
hi.
Tua ahihciangin Christian-hun zui-in ki-uapna puahphathuai kasa hi.Pupa-Ngeina pen Lawki-hun tawh kitangaih mahmah hi.Si-leh-sa kizoppih sanggam honkhat ki-uapna
ahih mah bangin muhna toisak thamlo-in minam itna zong toi-huamlua hi. Kiim leh paam muhna ding lampi tawm lua hi. Beh leh phungmin bekmah tawh minsialin lei
kituantuan a, minambup aading khualna om nawnlo hi.Minam nangawn minam ahihlam kithei kha lo hi.
Hih khang pen min mai-ah Behmin suan hun hinawnlo hi.Gambup minambup khual hun ahi hi.Min mai-ah behmin suan pen khialhna omlo napi, lungsim huamkhak
tawmlua ahih ciangin minambup makai dingin lungsim picing keileh kilawm sak hi.
Hunlui ki-uapna
Sanggamlam Nuneilam
1. Thalloh 1. Sunghpi
2. Zinkhak 2. Puu
3. Tanupi-Tuitaak 3. Sungh sabawl
4. Sawlla-Tanu-nauzaw 4. Veng thusa
5. Beh-thusa 5. Nuphal
Tu hun tak ciang in hih a tungaa bangin in khat leh khat ki-uap aa, agalva aa te tawh kisukkhakna om nawnlo hi. Zomite Thukhun pen Lawki-hun aadingin pauban omlo
dongin hoih napi, gamlian namlian, miphunglian suahna ding nakpi takin hong dongkholh leuleu hi.Anamnam in, abawng abawng in, akhil akhil in hong koih hi. Minampi
lungsim, gamlian lungsim hong paihkhiatsak aa beh khat leh khat kidem ki-elna khangsak hi.Gambuppi kithutuahna leh kikhual, kikepna thakiam sak hi.Lampithak zon hun
ta hi.
Khangthak Zomite
Beh leh Phung ki-uapna pan khua leh tui ki-uapna ah, khua leh tui ki-uapna pan gam leh minam ki-uapna ah, ih kalsuan ding hi.Nopna-dahna ah sanggam uu leh nau pen
pau kullo-in kidelh lel hi. Ki-uapna pen khuapiliante Block / khawkin kikhen a, khuaneute pen khuabup vaihawmna hihsak huai hi.
Sihhun aading
Zomite ih nat ciangin tanute in suntawh zantawh giahdenin ki ompih hi.Tuhun mipil gamte-ah dammawh nai-ah ki-om sak lo hi.A kilawhthei natna ahihleh zato nangawnah
kihawhsak lo hi.Cina anpiakhun, zatui suthun leh kisilsak hunin kidalna tawh cina keem uh hi.Agei-ah kual pihpih lo hi.Asih ciangin avotdei sungah seng pah hi.Ei kiangah
tua bang taktak haksa lai hi.Ahizongin misiluang sawtvei tutpih pen lauhuai mahmah hi.Kawlte asih ciangin singkuangah guangin a pua-ah koihkhia pah hi Ei Zomite in tua
bangin kihih nuam phalo hi. Ahih hangin siluang paihhun pen innteek dong lo-in Hausate leh Pawlpi uk siate kikup ding ahi hi. Nattom alauhuai pulnatna hang ahihleh,
manlaang tak a, paihding ahi hi. Natsau sih ngeina bang ahihleh zankhat sunkhat bang koih hang phamawh lo hi.
Misi tungtaang ah hunzat pen Pawlpi in zang henla, sigui tuamtuamte pen khangno nasep hileh pawl deidan omlo, beh leh phung deidan omlo, khua leh tui ki-uapna suak
pah lel hi.Meigong tagahte zong dongtang tuanlo hi. Kuakua a si zongin veng khangnote-in sing khuahkhat ciat, antang haikhat ciat, piakzawh bangbang dong ding uh hi. Ki-
uapna pen a zawng a hau kilamdangse lo hi.
Khuasungah lukhat damlo lokho zolo a omleh khangnote nikhat vakuan leh zokhin pah a, thazaang tuanlo hi. Innteek aadingin kumkhat sepding pen nikhatthu-in kizo a,
nasia mahmah hi. Mikangte'n Unity is strength acih hibangte ahi hi.Mimalte kipumkhat leh khuasung kipumkhat hi.Khua khempeuh kipumkhat leh gamleh minam
kipumkhat ahi hi. Minambup kipumkhatna pen khuasung pan kipan hi.
--------------------------------------------------------------------------
Tua ahih ciangin sanggam ki-uapna pan veng ki-uapna, veng ki-uapna panin khua leh tui ki-uapna, khua leh tui ki-uapna pan gam leh minam ki-uapna dongin ih khantohna
dingin ngaihsun khawmin geelkhawm ni.
FZI Thukhunpi pen kumkhat in khat vei ta Easter Khawmpi hun in a ki puah pha thei hi aa, tu kum in zong anuai aa bang in ki puah pha hi:
FZI Thukhunpi puahphatna(Amendment) 2009
Amendment 1:
President kum 3 a kizom aa a sem sa te kum khat tawlnga ding, tua zawh ciang ki tel kik thei ding.
Amendment 2:
Tel cing ding te kum 18 pan a tung siah hi ding aa, a tamlam ki ciang tan lo ding hi.
Amendment 3:
Biakna tawh kisai Holiday te ahi Christmas leh Easter Sunday te ah FZI in “FZI Jubilee te” a hih kei leh a hih thei zah in pawi bawl lo ding.
Amendment 4:
Membership Monthly Fee:
-January pan March kha sung a pia lo te warning letter pia ding
-April kha bei aa hong pia lo te: -Benefit bei na theih sakna lai pia ding
-hong piak kik zawh kha 6 a cin ciang Benefit ngah thei pan ding.
-Membership Registration fee($20) bek hong pia aa Monthly fee hong pia lo te:
-Sihna a tuak uh leh Benefit $5000 ngah lo ding
-Siatvatna ($100) bek ki pia ding hi.
-Sihkuan Critical Condition tun zawh ciang member hong lutpan nuam te:
-hong lut zawh kha 6 a cin khit ciang sihna a tuak leh Benefit $5000 ngah thei pan ding
-hong lut zawh kha 6 a cin ma aa a sih leh Benefit $5000 ngah thei lo ding.
Amendment 5:
A Nu a hih kei leh a Pa, Tedim kampau Zomi lian a hih kei leh pawl lut na sang lo ding
Amendment 6:
Kipawlna nin laih ding: "Florida Zomi Innkuan" pan => "Zomi Innkuan Florida, U.S.A"
-Combine service khat ah vote tawh khensat ding ci in ki thu kim
-Mi nih in thusung ding: Vote 51% pan a tungsiah tawh a zo zawzaw min ki zang ding
-----------------------------------------------------------------------------------------------------------------------------------------------------------------------------------------------------------------------------------------