Khua Do, 2003
Khua Do, 2001
| Khua Do ' 2008 Nopci tak in ki bawl! 2008 kum Khua Do Pawi Florida Zomi Innkuan in thupi tak in ki bawl hi. Tua lai ah FZI pan mun len (E.C member) teng in Vaimim Zo huan leh meh lim no nohong tawi uh aa, nuam tak in an kuang um khawnna ki nei hi. Zomi khangno 4 te pahtawina piakna ki nei thei hi.(Anuai ah a cing zaw in na en in). Zomi World Cup 2008 bawl dan ding zong ki gen khia aa, tu kum in Team 12 ki pha ding aa, kum dang tawh ki bang lo in nopcit cihtak in nopci ding cih thu ki za hi. A ki cing in ih theih nop leh Sport Secretary Lian Pau kiang ah ki dong thei hi. A nopci mah mah Zomi World Cup 2007 video honna zong ki nei hi. Hih video thu a a ki cing aa ih theih nop leh, a deih ih om leh, Music Director Pa Suan Mang khiang ah ki kan thei hi. Florida aa om veng 4 teng Zolaam ki dem na leh Zo lakam kidemna nopci tak in ki nei ziah ziah aa, Zo ngeina laam leh lai te pi cing tak in ki lak khia thei hi. Florida Zomi Innkuan Website thak honna zong ki nei hi. Hih Website pen Leitung ah Website hoih pen te tawh level ki kim ding aa a ki bawl a hihi. Hih Website tawh ki sai theih nop leh theihsak nop tuam tuam te a bawl pa Taang Tawng Khai kiang ah ki dong thei hi. Lung dam koh na 2008 Khua Do Pawi hong pai Zomi khat ciat tung ah ki lung dam mah mah hi. Pawi pai mipi 200 val bang ki pha ding aa, pawi a man 11:45PM dong kua mah ki ciah lo a hih man in tha ngah huai mah mah hi. 2008 Khua Do ni aa ciang tek pan hong pan pih pha deuh a nuai aa te tung ah Florida Zomi Innkuan in lung dam na ih pu laak hi: -An hong vaak FZI pan mun len EC makai pi teng -Khua Do thu a zaknop, kicing mah mah aa hong gen Thugenpi Pu Tual Khan Mang(Pu Mangtal) -Announcer hong sep sak Lia Vung Sian Zo (Zonu) -Announcer huh leh pahtawina piakna hong huh Lia Cingsen -Hamsa pi tak, hanciam tak aa laam a sin Veng te (mi ki kaih khop ding a ol loh dan belh) -Laam sin lo hi ta leh a hoih thei pen a hong laam Veng te (maikum ciang belh a sin sawm ta) -Zo Laam leh lakam kidemna ah hong mapang Veng makai teng leh kidemna hong makaihsak Pa Mungpi -Laam sinna ding aa a Inn hong phal Pa Ai Mung leh Pa John Thangpi te -Pawi ah a kizang Overhead Projector hong kawm Pastor Kham Do Thang leh MMC pawlpi te -A mai aa ih suan lai ngelh te hong bawl pih Bawi Bawi, Muangpi leh It Sang(Port St. Lucie) te u nau -Tui leh An lam sang hong et sak Lawm Piang -A mun ding a zong Pa Lian Pau -Music leh Sound Systems teng hong bawl sak Pa Suan Mang -Khua Do-2008 bawlna khempeuh hong vaihawm leh makai Taang Tawng Cin Khai, Lai leh Ngeina lam Makaipi, FZI. ---------------------------------------------------------------------------------------------------------------------- 2008 Khua Do Pawi Maan te a nuia ah na en ve, nasia thei lua hi ve ung... |
| Khua Do Pawi Florida Zomi Innkuan in kum khat sung in picing tak aa a bawl den pawi pi nga bang om aa, tua te in Kum Thak pawi, Zomi Nam Ni, Easter pawi, Khua Do pawi leh Thanksgiving pawi cih teng a hi hi. Zo ngeina pawi te a hi Khua Do pawi leh Zomi Nam Ni te pen kum sim in nasia tak in a ki bawl den ahi hi. |
Khua Do Pawi -Pu Tual Khua Mang (Vuandok Mangtal) Main Speaker, Khua Do Pawi, October 24, 2008 Hollywood, Florida, U.S.A Tuni Florida Zomi Innkuan te khuadona ah, thugen ding hun ka ngah man in, kipaak in, aangtang mah mah ing. Hi cibang aa hun manpha ong pia makai te leh zomi bup tung ah ka lungdam mah mah hi. Ei Zomi te in, mipi khem peuh tawh a ki sai, pawi lian nam nih i nei aa, khat peen Sialsawm ki ci in, khaal lai nisat hun, lo na sep teng ki man in, guah zu naai lo, khai ki tuh nai lo hun tak, bawl bei hun in ki bawl hi. A khat peen ahih leh tu ni aa ih bawl khuado pawi ahi hi. Hih hun peen tuuk, an laak khit aa ki bawl hi in, kum lui leh kum thak ki khen na hun hi. Kum lui, kum thak ci-in, ni khat bulh ding lah hi thei lo hi. Bang hang hiam cih leh ih khua ciat ah an laak khit ciang aa ki bawl hi in, khua khat leh khua khat, sim gam leh zo gam an laak hun hi bang lo hi. Kum khen pawi ih ci zong, Tuuk an laak lung dam pawi ih ci zong in hi thei kawi kawi in um ing. Tua ahih leh bang hang in, "KHUADO" ki ci mawk hiam. Ih gal te kido bek a, ih khua, ih pian na - kido cih bang - a ci ih om ding hi. KHUADO ih cih peen, ih khua leh a mite kido hi lo in, khua sung ah natna, satna, sihna, manna, zawnna, ngauna a piang sak thei, dawigilo, kaugilo, khua zing khua mial nasep na te ki hawl khia in, kido cih na hi. Ei gam ah khua khat leh khua khat, khua kheempeuh ih deihna, ih ngiimna akibat haang in, ih bawl zia, a daan a tuam tuam , themno kilamdang kim hi. Tua ahih man in, kei pianna , ka khua theih aa ki pan, a ki zang - Saizang khua khuado na thu ong gen ning. Zomi te in ih pian na ih teen na, ih theih a masa peen "Cimmnuai" a piang ki ci aa, tua Ciimnuai peen Saizang khua mah ah om ahih mah in, Saizang khua, Zomi ten na khua lak ah a masa peen ci-leeng zong ki khial lo kha ding hi. Tua ahih man in, Saizang khua a khuado ki bawl na ong gen leng - khua dang tawh a zia, a dan a kibat lian loh haang, a huampi ki bang in um ing. Tuuk hum, an laak hun in, khuado ciang aa neek ding, zu limtak in ki sa khol kim aa, a veeng, a sawm, beh leh phung cih bang in, ki lawm, ki pawl na tuam tuam om hi, a baan baan in tua kum aa a neek ding vok ki khawi hamtang hi. Khuado ni hun a tun ma , kha khat sap bang in, Sawm ciat ah, phit kilem ( practice ) hi. Meilah zong ki la in, ki khol hi. Hih hun sung mah in Sawm tuam tuam te in, Khuai - a bu in ki la aa , a ngah zawh zah zah uh - huan sak phei ah ki khawi hi. ( Ngaltheen - khuai ) hi pha diak hi, Khuado hun a nai ciang in, Hausa Upa - tein KHUADO ding a ni, taang ko hi. Khuado ni ding, azani taak in, inn kim ah taangman tangho kisu in, a zaan sung in ki huanpah hi. Nitaak khuamial tuung in, Sawm tuam tuam te pan, a veeng ciat aa, nungak tangval te tawh khua nawl mual pang ah pai in ki thawi hi, Tua hun tawh ki tuak - 8 p.m. pawl bang in, innkim ah (inn ciat ah) "KHUADO" kipan hi. Pasal khat in heiga / tuga tawi in, innsung kiim ah kawm ( zuak ) teng saat aa, dawi ciah in, kau ciah in, na khua na tui zong in, kum cing hi, kha cing hi ci in, innliim ah pusuak in tai ei tai ei ci-in, a hei / tu ga tawh kong biang lam deeng phei hi. Ama nung zui in - midang te pai in thau lawn man in lawn in, mei lah de in innkaa khuam te tung ah sun lai pek a nahtang kuak a thal lam a ki bulh sa te tung ah vaak diim diam hi. Tua hun mah in, mual pang aa mualsuake te, a ki hal na a ki kim ding in, khau bawk khih in a mai ah phiit tum te pai in a nung ah meilah de sa in, a hal kim dim diam in ki zui hi, Muh nop ki sa mah mah hi. Mual suak phiit leh mei de te ong tun ciang in inntual, innkakiim ah ki laam ziah ziah in - (1) Kum ki khen e, solkha dang ee, ziin aw na siang zong in. (2) Ziin in a siang lam zong hen aw siansung tui bang siang hen - ci in Khuado na tawh ki sai la te ki sa ziah ziah hi. Nitaak aa mei vaak, kauhawl a ki pat cil na ding in, Saizang khua ah a maang masa Thawmte ahih man in, Thawmte beh inn bul ahi, Luut kham te inn ah mei a taang nai hiam cih ki gal et aa tua inn ah mei taang aki muh ciang bek in a dang te ki pam pan pan uh hi. Zing sang khua vaak tawh ki tuak in tangho zong min ta aa, nau pang pawl in leep pah ngei ngai in tua mah zong nuam a kisa pi peen khat hi. Zingsang khua vaak a ki pan in, nupi te in, tangho, zuha, aak tui huansa, tuibuk leh sathau keng in haan - ( Amau beh- Haan ) ciat ah pai in, a sisa te luhawm teng ni lum awi sak aa, sathau nilh in, zu peuh tulh uh hi. A lu hawm teng kah ngeingai uh hi. Zingsang ni suah a ki pan in Khuado- Lawm ( Pawl ) sago te in sa go, ago zo lo teen saseh peuh lei in an neek khawm ki bawl hi. A zu sak sa uh beel pi vi ve in Keng in sun thapai, zune, sane in om uh hi. A an huante uh leh zutaak te ameltheih te uhki kholh in ki thuk uh hi. Nungaak tangval a kingai te bang ulian te in an leh zu kholh sak in mi tampi te in theih pih pah uh hi. Abeisa hunlaiin Khuado neek ni a zingsang intaangpi te in a hausa te innah siah a puak kawm in, tungman sial peuh bawlsa in puak uh hi. Tua tungman sialte sun lam ciangin upa te in khuanawl mual ah va koih uh hi. Ih biak ih pai te tung ah khawi leh gulh angetna cih bang khat hi. Khua do omkhawm peen mi kicing a nei zawdeuh te in ninih nithumbang ne in, a tamzaw ni khat in ki man hi. Vangteh khua ah Khuado hun in, a veeng veeng, a sawm sawm, a beh beh cih bang in, nah tang luang tawh khen nih ki suah in nah tang luang tawh ki saat, kidem na sports lian pi khat om hi. Nah tang luang lah gik si, hiam lo si ahih man in kua mah ki liam suah lo, a thahat te mah in lah zo bek aa, annual sports, khangno te lawpna, a ngaak lah mah mah ki mawl na khat hi. Hih a tung a k khuado thu te ih et ciang in. KHUADO peen (1) Kum lui leh kum thak ki khen na pawi. (2) An laak pawi. (3) Khuasung pan dawi leh kau te hawl khiat na pawi (Tu hun ciang kha galdo na leh sian suah na te tawh ki bang). (4) A sisa te phawk na leh thupha dawh na te hi. Ih pusa ih pasa te tung ah thupha ngetna. Ei Zomi khanglui te Paunaak ah, khuapi guah zuk ni a zingsang in lo na zong kei un la, Khuado ni zing sang ciang zi na zong kei un ki ci hi. A cih nop na in, khuapi guah zuk khit a ziingsang in lei tang khem peuh a hoih in kimu aa, khuado ni a ziingsang ciang in nu mei khempeuh a meel hoih hi - a cih na hi. Tu lai hun banglo in, khang lui lai in, kum khat sung in nih vei bek, sialsawm ni leh, khuado ni bek in, sa ki ne aa satui ki hawp bek ahih man in, mi khem peuh a ci malh in, a meel zong hoih zaw deuh cih na hi ta lawm lawm hi. Ih hehpih huai daan. Tu lai in, sa huan le u cin a tui ciil a masa teng na buak phot uh tawh ki naak khaih hi ven. Hi khuado in, a tung ah kum khen pawi, an laak pawi, dawi leh kau te hawl khiat na, siansuah na ki thuah hi ih cih mah bang in ei Zomi te a ding in, ni thupi mah mah khat in cianteh ni. Tua ahih man in, ei Zomi te peen, minam ki cian, ngeina hoih leh thu bul phuh hoih, a nei minam te ih hih na thu gen nuam hang. Ei Zomi te peen, beh leh phung ki nei dim diam in, ih pu, ih pa te khang (25) (30) dong ciang na ngawn a ciamteh minam ih hi hi. Lei tung ah, Lai Siang Tho lui sung a om Israel te sim loh, a pu a pa khang tua bang aa a ciamteh minam dang om lo hi. Kawlgam sung ah mi nam dang te bang, a nu leh a pa cih loh, khang nih dong na ngawn a ciamteh thei om lo hi, Tua sung ah beh ki nei dim diam aa, thal loh (bangkua) zinkhaak (sabal), sangam, sung leh pu, tanu, tanu khaak, thusa cih bang in, ki mat, ki seh dim diam sa in om aa, sih na, nopna khat peuh a om ciang a mau pan mun tek seem pah diam diam hi. Tua pan mun te tawh ki zui in zu hawm, sa hawm na te in zui pah hi. Sabaak bang ki tan khial leh a ma pan mun ding ong deih loh na hi ci in ki nolh pah lian hi. Ei Zomi peen, a mung ta Pasian ih theih ma pek na ngawn in KHA thu a sang a um te ih hi hi. Ih pu ih pa te khua khat leh khua khat ki do, ki kap in gal thah samat a ki dem na te zong a kha a ding cih na a hi hi. A sih ciang in, a kha in, a gal mat te sawl taak in nei ding, sai a mat leh sai tung tuang in sih khua mual suak ding cih a deih na hi. Pasian thu leh kha thu ong tun ciang - Full tak in ih saang thei pah aa, hamphat na pi khat hi. Ih sih ciang ganhing peuh, lung no peuh a tuam tuam suak ding cih a um mi te ih hi kei hi. A cil a pat pek in Pasian mah lian sak in, dawi peen thoih cih ciang, akheem ih hi zaw hi. Dawi te a ding sa ih piak ciang in a bil dawn, a mei dawn, a khe dawn, a sin them khat, a lung them khat tawh ki thoih hi. Ih sih, ih nop ni in, galman, saman, gal ai, sa ai te a tuam in zu phung ah ki tu sak in, a tuam in sa kitan hi. Gal aih, sa aih na ah gal sung sa, sasung sa a tuam in ki go aa, a man, a that a ai ngei teng bek a tuam in ki hawm sak hi. A zi te uh a min in ki sam aa, na satan ong saang in, ci in sahawm te a ki ko ciang in, tua a saang nupi te mi lak ah angtang mah mah hi. A sep bang a tha lawh bang in, a thatman saang hi. Healthy Competition hi. A sih ciang in zong a thah a mat tawh ki zui in, dial ki khai in, la ki sa hi. Sahang manlo, sahangai lo te inn ah sahang la kisa thei lo hi. Tua mah bang in Saila, cih a tuam tuam baan ah a nupa aa tong lo te a sih haang ton la ki sa thei lo hi. Hih bang teng kong gen ciang in ih pu ih pa te gamtat bang in, gamta ni, zui ni ka cih na hi lo in, tua teng ii thu sim ( ) - (essence) thu maan na, thutak cihtak na, sepna tawh ki zui bek in thaman ki saang cih na a thu bul phuh te a hoihna , a thu pina leh ih kep ding a ki sap na te ong han thawn nuam ka hi hi. Ih pu ih pa te ngei na ah ( ) om lo hi. ( ) om lo hi. Zuau tat, zuau thu ki hel thei lo hi. Thubulphuh hoih, ngaisutna hoih, Philosophy hoih mah mah a nei mi nam te ih hi hi. Ciimnuai a saki baak gel tui ah ki thuk cih te, Pa that zong tokhom ki guan cih te, suang pi suang neu in thek, sing vaang in gua nuam tuam cih te Laisiangtho thu thuuk vive tawh na ki tuak mah mah hi. Numei, Pasal pak tat nate zong ih pu ih pa te in a na lipkhap mah mah khat hi in, mizi, mita cih thadah, gal a bet ding ciang, salian a bet ding ciang in a ma zi nangawn tawh na lum khawm lo hi. Tua zah in siang tho nuntaak na na thupi sak hi. A gal te nangawn, inntual tui dawn in, suut a pom khit naak leh, ki that nawn lo hi. A thah khaak leh tual that (cold-blood murder) suakin a gau thuak zo lo hi. (mangkang te ngei na tawh ki bang hi.) Khat leh khat kam ki nial in a ki lai ciang in, a tuk kilhna tukphim ahi zong in, a tem puakna zaip ahi zong in, koih khia phot hi. Hi bang ngeina hoih (unwritten law) te peen mangkang te aa tawh ki bang hi. (You must not hit below the belt). Inn tuan thak khat peuh in lo lam ah sing suih sa a koih ciang in a tuak peuh in tawm ciat puak sak in, a tawp na ah khua nawl ki tun sak hi. A cimawh peuh ki huh diam diam hi. Khat bek in sa man in a pum puak ciang a gal muh ma sak pen sam in a phui pua sak hi. Hih ih pu ih pa te ngei na hoih, thu bulphuh hoih te a zui siam ding leh , a keem siam ding in Topa Pasian in thupha ong pia ciat ta hen. Thupha ngah minamte ih hihi. Tuhun thusuak nei a tampi te in zomi te thupha ngah minamte, Pasian teel tuam mi te ci in ki pulak hi. A hi zong in ih nuntaak na ih et ciang in, leitung ah Kawlgam a zawng peen gam, tua Kawlgam sung ah Zogam a zawng peen, keen lak mual lak ah teeng, lo khawh nang mun om lo. Kum khat ih khawh sa kum lang zong ki khom lo, ih gam ah na manpha bang mah piang lo; Koi lai ih Thu pha om hiam? A ci tampi om hi. Tu ni in kong han thawn nuam hi. Tua ih zawn ih ngau teng mah ih Thu pha hi zaw hi cih in kong gen nuam hi. Ei Zomi te ih Khuamuh kipat sawt nai het lo, galpi nih na khit ciang, Khualzin gamvak, mi nuntaak na a mu pan ih hi hi. Hau in nuam saleng zong ih kep nang pilna kinei nai lo hi.Thupha asang siam adawh siam leh akep siam ding om nailo ih hih man in Topa pasian in ong khal,ong seek lai phot a hi hi. Kawl gam mangkang te in ong laak cil lai in Pasian in Kazian te pilna leh phawk na na pia masa aa, mi lian mi hau tampi na pia hi. A gam, a leitang lah hoih mah mah, an tampi piang, singkung mapha, dol singkung te a bei thei lo za in om aa nuam sa mah mah hi. Kawlgam suahtak na ih ngah lai tak in, gamsung nasep, panmun thupi khempeuh na len uh hi. Tua thupa teng mah ki muan pih in, thauvui thautang tawh kumpi lang na pang uh hi. Tua man in tu ni ciang dong haksat na tuak uh hi. Nopsak na gau na pua zo lo uh hi. Tua khit ciang in Kachin te hun ong tung leu leu aa, a leitang uh lah hoih mah mah, lei sung sum piang suang manpha lah tam, dolsing, singkung manpha tampi piang, tua nopsak na teng mah pua zo lo in, guih theih kham theih tawh mi tam pi puk lawh hi. Ni dang lai in U Ne Win in a gal kap te a thu hilh na ah ( ) zawn na gau ki pua zo bek a, ( ) nopsak na gau ki pua zolo hi, ki dawm un - ci in thu hilh tawn tung ki ci hi. Tu in ahih leh ei Zomi te thupha a dawh siam, a saang siam ding in Topa Pasian in leitung mun tuam tuam ah ong theh thang hi. Tu hun lai tak bang in U.S.A. mun tuam tuam, Europe gam mun tuam tuam, Japan, Singapore, Malaysia, Australia te ah Zomi te in Khuado ki bawl ciat hi. Sang gam te aw Topa Pasian in tua thupha a saang, a dawh ding leh a kep siam ding in no te U.S. ah ong puak hi. Topa Pasian in ngiimna, geelna lian pi tawh ong puak ahi hi. A tung khathah, nang hanciam na tawh a tung ki sapeuh mah kei in. Tu lai tak ih din mun peen Topa Pasian in Moses makaih na tawh Santuipi a kan tan pih din mun hi. Santuipi a kan tan naang in han ciam kul lo, sep kul lo, a mai ah tuipi ki phel kham in leikeu tawn sak hi. Manna moh tawh a khong in vaak hi. A mai ah Jordan gun om lai hi. Baih tak in kantan sak peuh mah lo hi. A up na leh a kalsuam ngam na zah zah bek lei keu suak sak hi. Kanaan gam nuam a tun ciang gal nam sagih do kul lai hi. Tua gal nam sagih te in zum leh hiam, tawi aa galdo na zong hi. Nu leh pa pak tat na, duh hop huai ham na, zu leh kham theih guih theih zat na, ki phat sak na, lung sim neu na, midang te thusim loh na te khem peuh gal suak hi. A cih nop na in siang tho nun taak na, Christian nun taak na te khem peuh tawh ih nun taak ding ki sam cih na hi.Hih teng khem peuh ih zawh ciang bek in, U.S.A. nopna, hauh na te ciam kha, ne kha in, ih minam te phat tuam na ki pia zo pan ding hi hang. Tu aa na din mun tawh lung kim peuh ma kei in. Hun om kei ci lo in pilna a hih kei leh siam na khat peuh peuh sin in. Hih lam te lai ki hilh dan pen, theih loh theih loh in ki hilh hi. Ei gam lam bang in pum lot ngah bang hi lo hi. "How you earn?" leh "What you earn?" ki lam dang mah mah hi. Laisiangtho (Deutronomy) thu hilh kik na leh (Jeremiah 29) tawh kam ong vai khak nuam ing. A tawp na ah - hih thugen hun ka ngah na a meet dok in Yangon Tedim Association vai tawm ong gen nuam . . . . |
| Florida Zomi Innkuan Florida, U.S.A Since 2000 |
 |  |  |  |  |
Welcome to Florida Zomi Innkuan
| zomifla@yahoogroups.com zomiflorida@yahoogroups.com |
| zomiflorida.org |
Khua Do, 2004
Khua Do, 2007
| A bei sa kum Khua Do Pawi maan pawl khat |
| Mipi leh Maithak muakna FZI President -Pa Hangpi |
| Announcer- Lia Zonu Announcer Huh- Lia Cingsen Organizer- Taang Tawng Khai |
| Zomi bup aa ding thugetsakna Rev. Kham Do Thang |
| FZI Vice President -Pa Mungtawng Pahtawina Piakna (hong makaih, piak sak) Zin Mangpi pa Pu Mangtal |
| Zomi World Cup-2007 lahna Music Director- Pa Suan Mang |
| FZI General Secretary-Pa Kam Sian Lian Thuzaksakna Sport Secretary-Pa Lian Pau |
| Taang Pau Kip Zo High School Diploma - Pahtawina Taang Ngin Lian Mang |
| First Prize, Traffic Incident Writing (Florida Public Service Association) Taang Ngin Sian Tuang |
Miami Veng - Zolaam
Fort Lauderdale Veng - Zolaam
Kendall Veng - Zolaam
ZO LAAM KI DEM NA Khua Do Pawi ni in a veng a veng in Zo laam ki dem na nopci tak in ki bawl aa, Palm Beach veng in a khatna leh Fort Lauderdale veng in a nih na ngah uh hi. Hanciam a hong laam ciat veng teng tung ah lung dam mah mah hang. Mai kum ciang belh nasia sak zaw lai ni ei guai. Do na ling ling Do na ling ling e Gual in kum khua Do na ling ling e Gual in kum khua Do na ling ling e Do han ah nau bang Ka kap hi aw e |
Lakam kidemna
zola ang ki phuak
sak ka sa aa,
Khua Do la
dawng khat ka
phuah suk ngiap
a tah khu
sak ka sa aa,
Khua Do la
dawng khat ka
phuah suk ngiap
a tah khu
Hee Hee!
Ol lua, ol lua
Hong khem
zo kei nu teh.
Ol lua, ol lua
Hong khem
zo kei nu teh.
Hi banglai ciang
ciang a sei lo ing
ong sa nei vua!
ciang a sei lo ing
ong sa nei vua!
| Zo Pau Zo Lakam 1. Van tung, Lei tung = Thang Van, Sim Lei 2. Pasian, Dawi = Sau Mang, Zin Mang 3. Nu leh Pa, U leh Nau = Tun leh Zua, Ciin leh Tuai 4. Lawm Ngaih, Zi = San nem, Ang kawi 5. Ki man, Thong kia = Kol bul, Hen taa 6. Cina, Si = Um lai vei, Pham 7. Khut, Khe = Banzal, Pheiphung 8. Maitang, Mit tang = Maimit, Langhmai 9. Sahang, Vasa = Kamkei, Huiva 10. Lampi, Inn = Tuanglam, Saumang |
| ZO LAKAM KI DEM NA Zo Lakam ki dem na ah Veng Hau sa teng ki kai in Lakam mal 20 ki dem sak na ki nei aa, nopci mah mah hi. Hih bang aa picing tak aa hong bawl pih ih veng Hausa te tung ah lung dam mah mah hang. A mau theihna a ki sit hi lo zaw aa, a man pha Zo lakam hoih mahmah te ih neih lam khang thak te in hong theih theih na ding pulaak nopna, gimna a hi zaw hi. |
Pa Mungpi aw, a
ki dem te tua lam
hi kei veh aw!
ki dem te tua lam
hi kei veh aw!
| Taang Suan Lian Tuang High School Diploma-2008 Passed with Six Distinctions (All D, Burma) |
A mai aa Lai suan ding bawl lai tak
| Palm Beach Veng Zolaam |
| Web Master & Chief Editor Tawng Khai zokhai@yahoo.com |
