Home

                               FLORIDA ZOMI INNKUAN (USA)

            THU-KHUN PI LEH ZAT-DAN NGEI NA TE
                                                                     (Ki Puah Pha 2004)

                                  Constitution and By-law (Amended 2004)

Thu Masa (Introduction):

1.Florida State (USA) aa om Zomi te in, Apirl 23,2000 (Easter Sunday) ni-in, mipi ki kaih khop na khat ki nei-a, Zomi kipawl na khat neih
dingin, hoih ki sa hi. Tua kipawl napen , Zomi leh Zogam khan toh theih na ding-a, pan khawm theih na ding leh Florida leh USA gam sung-a,
om Zomi te ki huai kawm theih na ding-in, ki bawl-a, a min ding in, “Florida Zomi Innkuan (USA)” ci-in, ki phuak-a, kipawl na
“Thukhun Pi” Apirl 15, 2001 (Easter Sunday) ni-in, mipi thukim na tawh ki kip sak hi.
2. A tung-a ki gen “Thukhun Pi” pen kum 2004 ciangin, ki puah pha-a, zat dan ngei na khat tawh ki beh lap-in, “Florida Zomi Innkuan (USA),
Thukhun pi leh Zat-dan Ngei Na” (Ki Puah Pha 2004); “Florida Zomi Innkuan (USA), Consititution and By-law” (Amended 2004) ki
ci-in, Apirl 11, 2004 (Easter Sunday ) ni-in, mipi thu kim na tawh kikip sak hi.

Thukong Honna (Preamble):

Ko, Florida (USA) gam sung a teeng, tuun sung khat pan a piang, unau laizom khat ahi Zomi-te in Minam khat hih na tawh ka ki pawl khawm uh hi.
Ko, Florida (USA) gam sung a teeng Zomi-te in, a hong piangsak pa Anungta Pasian it in, ka muang uh hi.
Ko, Florida (USA) gam sung a teeng Zomi-te in, nisim nuntakna sung a ka tuah uh, nopna,dah na leh dong tuahnate ka puakkhop theihna dingun ka
kipawl khawm uh hi.
Ko, Florida (USA) gam sung a teeng Zomi-te in, ki-itna, kikhual na, ki zahtak na leh ki thukim na-te bulphuh in, hih “Thukhun Pi leh Zatdan Ngei
Na Te” zui-in, kipawl na sung ah ma ka pangkhawm uh hi.

THUKHUNPI (Constitution)

Khenpi 1: Kipawl Na Min (Name of the Organization):
“Florida Zomi Innkuan (USA)” ki ci hi.

Khenpi 2: Min Leh Kammal Te (Denfinitions):
1. Zomi:                   Minam min ahi hi.
2. Kipawl Na:          Florida Zomi Innkuan (USA) kipawl na ahi hi.
3. Thukhun Pi:         Kipawl Na in zuih ding-a, akhun, hih Thukhun Pi (constitution) cih nop na a hi hi.
4. Zatdan Ngei Na:   Kipawl Na in a Thukhun Pi a ki zuih na ah vaihawm zia ding, sep zia ding leh bawl zia ding te a hi hi. (By Law).
5. Thumeilet Te:       Kipawl Na in a kepcing ding, a siksan ding, a bul-let ding zia leh tong te a hi hi. (Policy).
6. Thuneih Na:          Kipawl Na, Pawl Mi khempeuh tung ah a kikim-a, a ki-pia hihtheih, septheih na leh Thukhun Pi in a piak hih
                    theih nate a hi hi. (Rights or Authority).
7. Mipi, Pawl Mi:     Kipawl Na sum leh khasim sum te pia-a, Kipawl Na sung a, a om, pawlmi khempeuh a cih na a hi hi. (Members)
8. Makai Pi Te:         Kipawl Na a makaih ding-a, mipi te-in, a teel, teel-cing ma kai te cih na a hi hi.(Executive Committee).
9. Veeng Makai Te:   A ki sap na om bang-a, veeng huam-a, om mi te leh Makai pi te in veeng makai ding-a, a teel uh makai te a hi hi.
                     (Neighborhood Organizers).
10. Thu Dot Pi Te:    Ki sap na a om bang-a FZI pua lam na sep na, FZI inn sung na sep na tuam-tuam te-a, thu dot pi ding te a hi uh hi.
                     (Advisors).
11. Kiteel Na:            Kipawl Na a makaih ding Makai Pi Te’ ( Executive Committee) kiteel na a hi hi.( Election).
12. Kiteel Na Makai Ding Mi Te: Kiteel Na Makai ding-a, Makai Pi te-in, a seh Makai Te cih na a hi hi.( Election Commission).

Khenpi 3: Kipawl Na Din–zia leh Kalsuan-zia (Motive of the Organization Define):
1. Hih Kipawl Na in biak na pawl pi khat ahih kei leh lawlpi tuam-tuam kipawl khawm na pawlpi (Denomination or Inter-denominational
Church) hi lo hi.
2. Hih Kipawl Na in gam leh mi-nam aa ding-a, nasem te’ kipawl na (Political Party) khat hi lo hi.
3.a. Hih kipawl na in, deih sak tuam nei lo (Non Profit Organization) Zomi Kipawl na (Non Government organization) khat a hi hi.
b. Hih Kipawl Na in, Florida State Law zui-in, kumpi ciam the na (Registration) la a hih man-in, tua State Law zui-in leh Kipawl Na
Thukhun Pi zui-in, kal suan ding hi.
4. Hih Kipawl Na in, biak na pawlpi khat a hih loh hangin, Zomi leh Pasian ki khen theilo a hih man-in, Biak Piak Na ( ChristianActivity) khat
ki nei tawn tung ding hi.
5. Hih Kipawl Na in, gam leh mi–nam aa ding na sem te ki pawl na ahih loh hang in, gam leh mi-nam it na tawh, sep zawh zah, sep theih
zah sem ding in, ki han ciam tawn tung ding hi.

Khenpi 4: Tupna leh Ngim Na Te ( Aims and Objectives):
USA gam sung-a, om Zomi te in:
1. A nungta Pasian um in, muangin, a mah ih biak khawm theih na ding.
2. Zomi, Zolai , Zo Ngeina leh Zogam Khantoh na ding in lung sim ki tuak in, vaihawm khawm teih na ding.
3. Kipawl Na Sung ah ki-it na, liangko ki kim na te bulphuh in ki pawl khawm theih na ding.
4. Zomi te haksat na tuam tuam pan-in, suak tak theih na dingin, lamlak, makaih theih na ding.

Khenpi 5: Thumeilet Te (Policies):
1. Pawlmi khempeuh in, a kikim hamphatna leh thuneihna nei ding uh hi.
2. Kipawl Na Sung ah ki –it na, kizahtak na, kithukimna-te kibulphuh tawntung ding hi.
3. Kipawl Na sung ah numei pasal, akhang aham, mizawng mihau, mipil mimawl, sakmi khangmi kideidanlo ding hi.
4. Kipawl Na tawh kisai thu leh la vaihawmna khempeuh ah pawl mi a tamzawte thu kim na ki mang ding hi. Pawlmi a tamzaw te
deihna kizahtak dinghi.
5. Leitung gam leh minam thu tuam tuam te tawh ki sai vai hawm na ding te ah ki pawl na tawh vai hawm kop na ki ma sak ding hi.
Adang ki pawl na te sang-in, FZI Kipawl Na ki bulphuh zaw ding hi.
6. Ki-it na masuan in Kipawl Na min tawh Anung ta Pasian Biakpiak khopna kimasak tawntung ding hi. Pawlmi khempeuh in suakta
tak in, aituam Upna zui-in, Biakna tawh kisia thu te vai hawm thei ding hi.

Khenpi 6: Makai Pi te (Executive Committee):
1. Makai pi (President), Thu-zeek Pi ( General Secretary), Sum Lai-at Pi ( Finance Secretary), Biakna lam makai pi ( Religious Seretary),
leh lai lam leh Ngei Na lam Ma kai pi ( Literature & Culture Secretary) cih pan-mun poi mawh te tawh ki lam ding hi.
2. A hun leh a ki sap na zui-in, Makai Pi pan-mun a ki sam dang te leh Veeng Makai te zong ki guang tawh tung ding-a a vek in, Makia
pi te thu neih theih na (Exacutive Power) ki pia kim ding hi.

Khenpi 7: Thu Dot Pi Te (Advisors):
Kumpi lam tawh ki sai thu dot pi leh FZI inn sung tawh ki sai thu dot pi ci-in , Thu Dot Pi-cing (Professional Advisors) ki nei ding hi.

Khen pi 8: Makai Pi Te’ Din Mun ( Stage of the Executive Committee Define):
1. Ma kai Pi Te pen FZI a nuntak na ding–a, vaihawmna na, sep khiat na khempeuh ah pan mun la ding te (Executive Body) a hi hi.
2.Makai Pi Te pen FZI Thukhun Pi leh Zatdan Ngei Na Te a gelh thei ding te (Legislative Body ) a hi hi.
3. Makai Pi Te pen FZI sungah a ki sam bang –a thu khen thei ding te (Judicial Body) a hi hi.

Khen pi 9: Kikhop Pi Ni Te (Functions and Gatherings):
1. Zomi Nam Ni.
2. Thawhkik Ni (Easter Sunday).
3. Khuado Pawi (Khuado Festival).
4. Lungdam Koh Pawi leh FZI Kumcin Kikhop Pi (Thanksgiving Day).
5. Lungdam Bawl Ni (Christmas Day).
6. Zomi Biak Piak Kikhop Khawm Na (Zomi Combine Worship).
7. Thu Phamawh Mipi Kikhop Na.

Khenpi 10: Makai Pi Te Kiteel Ni (Election Day):
Kum sim in, lundam koh pawi leh FZI kumcin kikhop pi (Thanksgiving Day)ni-in, kiteel na om ding hi.

Khenpi 11: Teel Theih Ding Mi (Electoral Candiadate):
1. Kum 18 leh a tamzaw a pha pawl lut na leh khasim sum a pia den Zomi hi ding hi.
2. FZI Thukhun Pi leh Zat-dan Ngei Na te bang-a, na sem kalsuan nuam mi hi ding hi.

Khenpi 12: A Teel Thei Ding Mi (Elector or Voter):
Kum 18 leh a tamzaw apha Pawl lut Mi hi ding hi.

Khenpi 13: Ki Teel Zia Ding (Process of Election):
Ki Teel Na a makaih ding mi (Election Commission) a ki sam zah ki seh ding-a tua te makiah na tawh, siangtho tak leh suak-tak in
(Free and Fair) ki teel ding hi.

Khenpi 14: Makai Pi Te’ Hun (Terms of the Executive Committee):
1. Kum khat sung hi ding hi.
2. A ki zom in kum thum ciang sem thei ding hi.
3. Kum khat a khawl khit ciang in, kiteel kik thei dinghi.
4. Makai pi (President) khat in, Makai pi (President) pan-mun, thum vei a hih kei leh a ki zom in, kum thum a sep khit leh FZI Makai
Pi khat peuh hih theih na pan, Khawl ding (Retired) hi.

Khenpi 15: Makai Pi Te Ki-ap Na (Handing-Over of the Executive Committee):
Kiteel Ni aa ki pan kha-khat sungin, vai khempeuh ki-ap siang ding hi.

Khenpi 16: Makai Pi Te Kheel Na Leh Beh-lap Na (Changes and Replacements):
Thu khat peuh hang in, Makai pi te kheel nop na, beh lap nop na a om leh:
1. Kikhop Pi Ni te-in, mi pi a tam zaw thukim na tawh ki kheel thei, ki beh lap thei ding hi.
2. Thu Phamawh Mipi Kikhop Na ki sam-in, mipi a tamzaw thukim na tawh ki kheel thei ki beh lap thei ding hi.

Khenpi 17: Pawl lut na leh Pawl Tawp Na ( Membership):
1. USA Gam sung-a, a om Zomi a ut khempeuh, kipawl na in a huam tehih, pawl-huam mi hi ding hi.
2. FZI Thukhun Pi leh Zat Dan Ngei Na Te thukim-a kipawl khawm na a ut pawl-huam mi khempeuh in, Pawl Lut nasun
(Membership Fees) pia–in, Pawl lut thei ding hi.
3. Pawl Lut mite tung ah Khasim sum (Monthly Fee) ki dong den ding hi.
4. Pawl Lut Mi khat in a man’ ut thu-in, Kipawl Na pan a ut hun-hun in, tawp thei ding hi.
5. Pawl Lut Mi khat peuh; Pawl lut mi a tam zaw thu kim na a om leh ki pawl na pan in ki tawp sak thei ding hi.

Khenpi 18: Phat Tuam Na (Benefits):
1. Pawl Lut Na sum pia-a, Khasim sum a pia den pawl lut mi khat peuh a si leh Dong-Hu phat tuam na sum a ki seh sa zat ki pia ding hi.
2. Pawl Lut Mi Khat peuh ee Nu leh Pa (Nu kik ,Pa kik), zi leh pasal, tate leh sang gam laigul zom te in, sih na a tuah uh leh, Biak na
lam ma kai te leh veng ma kai te vai hawm na tawh heh nep ki khop na ki nei pih ding hi.

Khenpi 19: Sum Zon Na Leh Zum Zeek Na (Budget)
1. Kipawl Na sum a khan toh thei na ding in, ma kai pi te in vai huawm tawng tung ding uh hi.
2. A ki she sa Dong Hu phat tuam na sum bang ah nop na dah na pah tawi na leh ki pawl na tawh ki sai nasep na tuamtuam te ah a ki
sam bang in makai pi te in sum zeek thei ding uh hi.

Khenpi 20: Laipai Lailut Leh Lai Tawh Thu Ki Zaak Na (Corrsepondence):
1. Kipawl Na min tawh Laipai lailut na sep na khempeuh Makai Pi, Thu Zeek Pi Huh te–in, sem ding, geel ding uh hi.
2. Kipawl na min tawh a hun zui-in, Laibu (Magazine..etc.) ahi zong in, Lai tawh thu ki zaak na ( News..etc.) khat peuh a ki bawl leh,
Lai lam ma kai pi te tawh kop-in Makai Pi Te in, vaihawm ding uh hi.

Khenpi 21: Thu Neih Na (Organization Right):
1. Kipawl Na sungah Buai na a om leh Makai Pi Te (Judicial Body) in, lem ding uh hi.
2. Makai Pi te thu kim na a hih kei leh pawl lut mi a tam zaw thu kim na om lo in kua mah peuh in FZI taang-in thu gen thei, lai gelh
thei, palaai thei lo ding hi.

Khenpi 22: Kipawl Na Phual Pi (Head-quarters):
FZI- Phual pi (Zum Inn) kician khat a ki nei thei ma teng in thu Zeek pi omna peuh peuh FZI- Phual Pi (Zum) cin in ki zang ding hi.

Khenpi 23: Thukhun Pi Puah Phat Na Leh Kip Sak Na (Bills and Amendments):
1. Hih Thukhun pi puah phat nop na a om leh a ki sam bang in Makai pi te (Legislative Body) in gelh ding uh hi.
2. A ki puah pha Thukhum Pi a om leh Kikhop pi ni te in a hi zong in Thu Pha Mawh Mipi Kikhop na khat peuh ki sam in a hi zong
in tua ni tua hun te aa Mipi a tam zaw thu kim na tawh ki kip sak ding hi.

Khenpi 24: Thukhun Pi a ki gelh na Lai Bul Pi (Original Language):
Hih FZI Thukhun Pi a ki gelh na Laibul pi pen “Tedim Zolai” hi ding hi.

ZAT-DAN NGEI NA TE (By-law)

Khenpi 1: Makai Pi Pan Mun Te (Positions of the Executive Committee):
1. Ki Pawl Na in peel-lo a, a ki sap leh a neih teei-teei ding Makai Pi Poi Mawh pan mun te:
a. Makai Pi (President)
b. Thu Zeek Pi (General Secretary)
c. Sum Lai At Pi (Finance Secretary)
d. Biak Na Lam Makai Pi (Religious Secretary)
e. Lai Lam leh Ngei Na Lam Makai Pi (Literature & Culture Secretary)
2. A hun leh a ki sap na zui-a, a ki beh lap thei ding Makai Pi pan-mun te:
a. Makai Pi Huh (Vice President )
b. Thu Zeek Pi Huh (Associate General Secretary)
c. Sum Lai At Pi Huh (Assitant Finance Secretary)
d. Sumkem Pi (Treasurer)
e. Biakna lam Makai Pi Huh (Assistant Religious Secretary)
f. Music Lam Makai Pi (Music Secretary)
g. Ki Mawlna Lam Makai Pi (Games & Sport Secretary)
h. Veeng Makai Te
i. Sazian Sit Te (Auditors)
3. a. Veeng Makai Ding-in, Veeng Khat ah mi khat hi ding hi.
b. Sazian Sit (Auditor) mi nih hi ding hi.

Khenpi 2: Thu Dot Pi Te (Qualifications of the Advisors):
1. a. Thu Dot Pi cih ciangin, FZI huang pua lam aa na sep na khat peuh peuh ah ei tang-ding a, ih zat taang mi (Agent; Broker;
Attorney…ect.) khat peuh peuh cih na a hi hi. A hun leh ki sap na zui-in, Makai Pi te-in , tua bnag taang-mi te a hi Thu Dot Pi-
cing te (Professional Advisors) la ding, cial ding, saap thei ding hi.
b. FZI huang-sung ah thu dot pi ding in, pil na theih na pi-cing a nei, FZI hoihh zawk na ding a deih sak Pawl Lut Mi Thu Dot Pi-
cing nih Makai Pi te-in, she ding hi.
2. Thu Dot Pi te-in, Makai Pi pan mun (Executive Power) ngah lo ding-a, ahun ciang tan zogn nei lo ding hi.

Khenpi 3: Makai Pi Ding-a, A Kiteel Thei Ding Mi Te (Qualifications of the Electoral Candidates)

1. Kipawl Na in peel-lo a, a ki sap leh a neih teei-teei ding Makai Pi Poi Mawh te pen:
a. Mipi a om lak sung pan a khang-ham kum ki cing khinsa mi hi ding hi.
b. FZI member a lut zawh a tawm pen tum nih hi ding hi.
c.FZI a pa-lai zoding mi, leitung lam pilna, biakna lam pil na ki ciang nei-a, a zah tak huai mi hi ding hi.
d. Kum thum ki zom sem khin-a, kum khat a khawl phot ding te hi lo ding hi.
e.Thum vei a hih kei leh kum thum ki zom a sem khin Makai Pi (President) te hilo ding hi.
f.Thukhun Pi, Khinpi 11.1.2. aa bang hi ding hi.
2. Makai Pi a ki sam lai te khempeuh pen Thukhun Pi, Khenpi 11.1.2. aa bang hi ding hi.

Khenpi 4: Veeng Makai Ding Te (Neighborhood Organizers):
1. A kisap na a om bang in, Makai Pi Te in, a veeng-huam a-om, te tawh ki thu za in, Veeng Makai guang ding uh hi.
2. Veeng Makai ding-a, teel theih ding mi pen Makai Pi khat-a, teel cingsa mi hilo ding hi.
3. Veeng Makai te’ hun pen Makai Pi dang te tawh ki bang ding hi.

Khenpi 5: Kiteel Dan Ding (Process of Election):
1. Kiteel ni a cin ma-in, Makai pi te-in, ki teel na makai dingmi (Election Comission) thum seh ding uh hi.
2. Kiteel Ni ciangin, a kiteel theilo ding mite kipulaak khia masa ding hi.
3. Kiteel na makai te-in,Simtham Me (Secret Ballot) tawh Pan Mun a ki sam zah ding mi (EC Candidate)la ma sa ding uh hi.
4. Pan Mun a ki sam zah ding mi (EC Candidate) a ki ngat khit ciangin, mi pi-in, Simtham Me (Secret Ballot) mah tawh Makai Pi
(President) leh Thuzeek Pi (General Secretary) ding mi nih (direct) in, teel ding uh hi.
5. Pan Mun kisam zah mi te (EC Candidate) lak pan-in, Makai Pi (President) leh Thuzeek Pi (General Secretary) ding mi nih aki teel
khit ciangin, adang a omlai (Candidate) te pan mun ding pen, a kiteel khin thak Makai Pi leh Thuzeek Pi te-in, makaih in, siam na
kivak na zui-in, ki she (Form up) ding uh hi.
6. Kiteel ni mah-in, kiteel na teng leh ki she na (Form Up) khempeuh ki zo siang ding-a, tua kiteel ni mah in, kiteel na makai te (Election
Commission) in, kiteel na ngat zah leh panmun ngat n ate tung ah min thuh in, mipi te tung ah a puaak khiat khit uh ciangin, amau’
nasep na a man leh a bei ta hi ding hi.

Khenpi 6: Kiteel Na Makai Ding Mite (Qualifications of the Election Commission Members):
1. Pawl Lut Mi te lah ah khangham khin, pil na theih na ki ciang-a, a zah tak huai mi hi ding hi.
2. Deih sak tuam leh deih sak loh tuam zang lo in, thuman na tawh tang tak-a, na a sem mi (Neutral Person) hi ding hi.
3. Kiteel Na ah a ki teel thei lo ding mi hi ding hi.

Khenpi 7: Pawl Lut Dan Leh Pawl Tawp Dan (Membership):
1. pawl Lut Na sum (Membership Fee) US $ 20.00 (Sawm Nih) tawh pawl lut na ki bawl ding hi.
2. Kha sim sum (Monthy fees)mikhat US 5.00 (Pek Nga) hi ding-a, inn kuan khat ah Pawl lut mi nih leh a tam zaw a om leh US $ 10.00
(Sawm Khat )hi ding hi.
3. Kham Tawn Pawl Lut Na (Life Membership) a bawl nuam te a Pawl Lut cil ni-a, ki pan kum sawm-nga ki sim-in, tua zah man kha
sim sum ki la ding hi.
4. Pawl Lut mi khat ama’ ut thu in, pawl tawp a hi zong in, ki tawp sak a hi zong in, pawl tawp na khat peuh peuh a om ciangin, tua
pawl tawp te-in, a piak khiat sa pawl lut na sum leh khasim sum te ki pia kik lo ding hi.
5. Pawl lut na sum kha thum ki zom-a, a pia lo teleh Ki Pawl Na sung na sia tak-a, a nawngkai ska Pawl Lut mi te tawh ki sai-in, Pawl
Lut mi a tam zaw thukim na a om leh Pawl Ki Tawp Sak thei ding hi.

Khenpi 8: Sum Zon Dan Leh Sum Zeek Dan (Financial Funding and Allocation):
1. Kipawl Na sum a khan toh theih na ding in, kum sim-in, Makai Pi te-in, sum zon theih na tuam tuam tawh sum zong den ding hi.
2. a. Pawl Lut Na Pia-a, Kha sim sum a pia den Pawl Lut Mi khat a sih leh Dong-Hu Phat tuam na sum US $ 5000.00 (Tul Nga) ki pia
ding hi.
b. Hih Dong-Hu phat tuam na sum US $ 5000.00 (Tul Nga ) pen a ngah thei dingte’ tung-taang ah a ki zat kei leh a mau’ Phat Tuam
na a ngah thei (Beneficiary) te’ tung ah ki pia ding hi.
c. Pawl Lut Na pia-a, Khasim sung a pia dem Pawl Lut MI khat leh a tam zaw te-in, hun khat thu-in, sih na a tuah uh-a, khat ciat in
dong-Hu sum ki she sa Tul Nga a ngah kim zawh kei leh, tua hum lai tak-a, FZI in a neih sum khem peuh leh adang a zon theih sum
khempeuh a ki kim in, ki hawm sak ding hi.
3. A dang dahna nop na, pah tawi na leh FZI tawh ki sai na sep na tuam tuam te tawh ki sia-in; EC a tamzaaw thukim na bek twh
sumzeek na ki bawl ding hi.

Khenpi 9: Makai Pi Te’ Tavuan Leh Sep Dan Ding (Duties and Conducts of the Executive Committee):
1. Thu kikhup na (Business Meeting) a ki sap ciangin, Makai Pi (President) ahih kei leh Thu Zeek Pi (General Secretary) in sam ding hi.
2.a. Thu kikup na (Business Meeting) khempeuh ah Makai Pi (President) in chairman ding hi.
b. Makai Pi (President) a om theih kei leh Makai Pi Huh (Vice President) in tavuan la ding hi.
c. Makai Pi Huh a om theih kei leh Thu Zeek Pi (General Secretary) in tavuan lading hi.
d. Makai Pi, Makai Pi Huh, Thu Zeek Pi te a vek un a om theih kei uh leh tua (meeting) pen, a huh lem zaw khat ah ki khin ding hi.
3.a. Thu kikup na khat peuh thu ki kum khom a cin kei leh thu khen sat na ki nei lo ding hi.
b. Thu kikup na khat peuh ah thu ki kum ding-a, a kiseh sa mi a tam zaw a om leh thu ki kum khom cing ki ci ding hi.
c. Thu kikup na khat peuh ah, thu khen sat na khat peuh a ki bawl ciang in a tam zaw thu kim na tawh thu ki khen sat ding hi.
d. Thu ki kup na khat peuh ah, ki thukim na om zolo-in, din-khiat na (walk out)a om leh tua (meeting) pen, a hun lem zaw khat ah ki
khin ding-a, tua ni ciangin, a kul leh (Chairman pa’ Veto)ki zang ding hi.
4.a. Thu kikup na khat peuh ah thu sung nuam te-in, khut lam-in, chairman pa/nu (Mr./ Mrs. Chairman) ci-in, ngen ding (address) hi.
b. Thu sung nuam mi nih leh a tam zaw hunk hat thu-in, a ki tuah leh chairman pa/nu in a piak pen pen in, sung masa ding hi.
5. Lai Lam leh Ngei Na Lam Makai Pi pen, FZI Website leh E’group Moderator hi ding hi.

Khenpi 10: Kikhop Pi Ni Te Seh Dan (Convening of Celebrations and Meetings):
1. Zomi Nam Ni kum sim in February 20 ni-in, ki bawl ding hi.
2. Khua Do Pawl pen kumsim in, October kha bei kuan mipi kikiah khop huh lem pen khat in ki bawl ding hi.
3. Lungdam Bawl Ni pen December 25 sang-a, a lem zaw om-a, mipi a tamzaw a thu kim leh tua a lem zaw ni-in, ki bawl ding hi.
4. Veeng kikhop ipen Veeng huam-a, om te leh Veeng Makai te’ thu kim na bang in, ki seh ding hi.
5. Zomi Combine Worship, leh Zomi Holim Na pem kha khat in khat vei a lem thei pen ni ding khat Makai Pi te-in, seh ding uh hi.

Khenpi 11: Zatdan Ngei Na Te Puah Phat Na leh Kip Sak Na (Bills and Amendment):
1. Hih Zatdan Ngei Na Te peuh phat nop na a om leh, Makai Pi Te ( Legislative Body) in puah khat nop na thu sun (Proposal) la-in,
puah phat nop na khempeuh gelh ding uh hi.
2. A ki puah pha Zatdan Ngei Na Te Kip Sak nading a om leh Kikhop Pi Ni te a hi zong in, Thu Pha Mawh Mipi Kikhop Na Khat
peuh kisang in a hi zong in, tuan ni tua hun te-a, mipi a tam zaw thukim na tawh ki kip sak ding hi.

Khenpi 12: Zatdan Ngei Na Te a ki gelh na Lai Bul Pi (Original Language):
Hih Zatdan Ngei Na Te a ki gelh na lai bulpi pen, ‘Tedim Zolai’’ hi ding hi.


Hih FZI Thukhun Pi leh Zatdan Ngei Na Te, April 11, 2004 (Easter Sunday) ni-in, mipi a tam zaw thukim na tawh ki kip sak hi
-----------------------------------------------------------

THUKHUNPI PUAHPHATNA(AMENDMENT) 2009

2009 Kum Easter Sunday ni FZI Khawmpi ah a nuai aa bang in Thukhunpi Puahphatna ki nei hi:
1. President kum thum(3) a kizom aa a sem sa te kum khat tawlnga ding, tua zawh ciang ki tel kik thei ding
2. Tel cing ding te kum 18 pan a tung siah hi ding, a tamlam ki ciang tan lo ding hi.
3. Biakna tawh kisai Holiday te(Christmas leh Easter Sunday) ah FZI in “FZI Jubilee te” a hih kei leh a hi thei zah in pawi bawl lo ding.
4. Membership Monthly Fee:
a. January pan March kha sung a pia lo te theihsakna lai (warning letter) pia ding
b. April kha bei aa hong pia lo te: “Benefit” a bei na theih sakna lai pia ding, tua zawh ciang hong piak kik aa leh hong piak kik zawh kha 6 a cin
ciang Benefit ngah thei pan ding.
c. Membership Registration fee($20) bek hong pia aa Monthly fee hong pia lo te: Sihna a tuak uh leh Benefit $5000 ngah lo ding, Siatvatna bek
ki pia ding hi.
d. Sihkuan (Critical Condition) tun zawh ciang member hong lutpan nuam te: hong lut zawh kha 6 a cin zawh ciang Benefit ngah thei pan ding;
hong lut zawh kha 6 a cin ma aa a sih leh Benefit $5000 ngah thei lo ding.
5. A Nu, a Pa, a Zi, a Pasal khat peuhpeuh Tedim pau (Tedim ngamsung aa Zo pau khat peuh) a pau Zomi lian a hih kei leh pawl lut na sang lo ding

Hih FZI Thukhun Pi Puahphatna April 12, 2009 (Easter Sunday) ni-in, mipi a tam zaw thukim na tawh ki kip sak hi
---------------------------------------------------------------